༡ རོ་དྲུག་དང་ནུས་པ་བརྒྱད།

         བོད་ལུགས་གསོ་བ་རིག་པའི་སྨན་རྫས་མདོར་དྲིལ་ན་རོ་དྲུག་སྟེ་མངར་བ་དང་། སྐྱུར་བ། ལན་ཚྭ། ཁ་ཚ་བསྐ་བཅས་དྲུག་དང་། ནུས་པ་བརྒྱད་དེ་ལྕི་སྣུམ་བསིལ་རྟུལ་དང་། ཡང་རྩུབ་ཚ་རྣོ་བཅས་བརྒྱད་དུ་གཏོགས་པ་ཡིན།  དེ་ལ་ཉེས་གསུམ་རྣམ་པར་གྱུར་ཚེ།  ལྕི་སྣུམ་གཉིས་ཀྱིས་རླུང་དང་བསིལ་རྟུལ་གཉིས་ཀྱིས་མཁྲིས་པ་སེལ་བ་དང་ཡང་རྩུབ་ཚ་རྣོ་བཞི་བོས་བད་ཀན་སེལ་བར་བྱེད་དོ། ། 

༢  སྨན་གྱི་ཡོན་ཏན་བཅུ་བདུན། 

         སྨན་གྱི་ཡོན་ཏན་བཅུ་བདུན་ནི་འཇམ་དང་ལྕི་དྲོ་སྣུམ་དང་བརྟན། གྲང་དང་རྟུལ་བ་བསིལ་མཉེན་སླ་དང་སྐམ། སྐྱ་དང་ཚ་བ་ཡང་དང་རྣོ་རྩུབ་གཡོ་བ་བཅས་ཡིན་པ་དང་། དེ་ནི་རྣམ་པར་གྱུར་བའི་ཉེས་པ་གསུམ་འཕེལ་ཟད་འཁྲུགས་གསུམ་དུ་གྱུར་བའི་ནད་ཀྱི་མཚན་ཉིད་ཉི་ཤུ་འཇོམས་པའི་གཉེན་པོ་ཡིན་ནོ། ། ཡོན་ཏན་བཅུ་བདུན་ནི་རོ་དྲུག་པོ་གང་རུང་ལས་བྱུང་བ་ཡིན་པ་དང་རོ་དྲུག་ནི་ས་ལ་སོགས་པའི་འབྱུང་བ་ལྔས་བསྐྱེད་པ་ཡིན་པས་ལྕི་བ་དང་སྣུམ་པ་ལ་སོགས་ཀྱི་ནུས་པ་ཡང་འབྱུང་བ་ལས་བྱུང་བ་ཡིན་ཏེ། རོ་དྲུག་ལས་ལན་ཚྭ་བསྐ་མངར་རྣམ་གསུམ་གྱིས་བསྐྱེད་པའི་ནུས་པ་རིམ་པ་བཞིན་དུ་ལྕི་བ་དང་། དེ་བཞིན་ལན་ཚྭ་སྐྱུར་མངར་གསུམ་གྱི་ནུས་པ་རིམ་བཞིན་སྣུམ། བསྐ་ཁ་མངར་བ་གསུམ་གྱི་ནུས་པ་རིམ་བཞིན་བསིལ་བ་ཡིན་པ་སོགས་དེ་བཞིན་ནོ། ། སྨན་གྱི་སྐྱེ་གནས་ལ་ཉི་མའི་སྟོབས་ཅན་གྱི་དྲོད་སྨན་དང་ཟླ་བའི་སྟོབས་ཅན་གྱི་བསིལ་སྨན་གཉིས་ཀྱི་ངོ་བོར་མ་གནས་པ་གཅིག་ཀྱང་མེད་པ་དང་། ལུས་ལ་གནས་པའི་ཉེས་གསུམ་ཡང་ས་ཆུ་མེ་རླུང་སོགས་འབྱུང་ལྔའི་ངོ་བོ་ཡིན་པས་ནད་ཀུན་མདོར་དྲིལ་ནའང་ཚ་བ་དང་གྲང་བ་ལས་མ་འདས། དེ་ལ་ཚ་བའི་ནད་ལ་བསིལ་སྨན་དང་། གྲང་བའི་ནད་ལ་དྲོད་སྨན་སྦྱོར་བ་ཡིན་ནོ། །