ཀུ་ཡ་རྣམས་དྲི་ཆུའི་སྟེང་དུ་གནས་ན་ནད་དེ་གློ་སྙིང་སོགས་ལུས་ཀྱི་སྟོད་ལ་ཡོད་པ་དང་། ཀུ་ཡ་དྲི་ཆུའི་བར་དུ་གནས་ན་ནད་དེ་མཆིན་མཆེར་མཁྲིས་པ་སོགས་ལུས་ཀྱི་བར་ན་ཡོད་པ། ཀུ་ཡ་དྲི་ཆུའི་འོག་ཏུ་གནས་ན་ནད་དེ་མཁལ་མ་དང་རྒྱུ་ལོང་། ལྒང་པ། ཆུ་སོ་སོགས་ལུས་ཀྱི་སྨད་ན་ཡོད་པ་བཅས་མདོར་ན་ཀུ་ཡ་གནས་པ་བཞིན་ནད་ཀྱང་དེ་ལྟར་ཤེས་པར་བྱའོ།། ལྷག་པར་དུ་ནད་ཚ་གྲང་གང་ཡིན་ངོས་མི་ཟིན་པའི་སྐབས་སུ་དྲི་ཆུར་བརྟག་པ་ནི་མུན་པ་སེལ་བའི་སྒྲོན་མེ་ཡིན། དྲི་ཆུ་སྙོམས་པར་གནས་པའི་སྐབས་སུ་དྲི་ཆུའི་སྟེང་འོག་བར་གསུམ་གང་དུའང་ཀུ་ཡ་མཐུག་པོ་ལིང་གིས་བྱུང་ན་ནད་གཞི་ཚ་བ་དང་། ཀུ་ཡ་སྲབ་ན་གྲང་བའི་ནད་གཞི་ཡིན་ནོ།། བརྟག་ཚུལ་དགུ་ལས་དྲི་ཆུའི་ཁ་དོག་ལ་བརྟག་པ་ནི། ལུ་མའི་ཆུ་སྟེ་ནེའུ་གསིང་གི་དཀྱིལ་དུ་ས་འོག་ནས་ཡར་འབུར་བའི་ཆུ་ལྟར་སྔོ་ལ་སླ་བ་ཡིན་ན་རླུང་གི་ནད་དང་། སྨུག་པོ་རྒྱ་སྐྱེགས་ཀྱི་སྣོད་ཆུས་བཤལ་བ་ལྟར་ཟིང་སྐྱར་འདུག་ན་ཆུ་སེར་གྱི་ནད། ཏིལ་མར་རམ་རྩི་མར་ཡུན་རིང་བསྐོལ་བའི་ཞུན་མར་གྱི་མདོག་ལྟར་སེར་ནག་ཡིན་ན་རིམས་ནད། དྲི་ཆུའི་རླངས་པར་བརྟག་པ་ནི། དྲི་ཆུ་ཚན་དེའི་དུས་སུ་རླངས་པ་ཆུ་ཚན་ལྟར་ཤིན་ཏུ་ཆེ་ཞིང་དྲི་ཆུའི་ཁ་དོག་ཀྱང་བསྒྲིབས་འགྲོ་བ་ལྟ་བུ་བྱུང་ན་ཚ་བ་ཤིན་ཏུ་རྒྱས་པའི་ཆུ་དང་། དྲི་ཆུའི་རླངས་པ་ཆུང་ལ་དུས་སུ་ཡལ་མི་འགྲོ་བར་ཡུན་རིང་དུ་གནས་ན་ཚ་བ་གབ་པའི་ནད་དམ་རྙིངས་པའི་ཚ་བ་ཡིན། དྲི་ཆུ་བཏང་མ་ཐག་པ་ཚ་མོའི་དུས་སུ་དྲི་ཆུའི་དྲི་མ་ཤིན་ཏུ་དུགས་ལ་དཀུ་ན་ཚ་བ་ཆེ་བའི་ནད་དང་། དྲི་མ་གཏན་ནས་བྲོ་རྒྱུ་མེད་པའམ་ཡང་ན་ཆུང་ངུ་ཞིག་ལས་མེད་པ་ནི་གྲང་བའི་ནད་ཡིན། མེ་ཏོག་གམ་ལྦུ་བ་ལ་བརྟག་པའི་ཚུལ་ནི། དྲི་ཆུ་དཀྲུག་པའི་སྐབས་སུ་ལྦུ་བའི་མདོག་སྔོ་ཞིང་མཛོ་མིག་ལྟར་འབུར་ལ་ཆེ་བ་ནི་རླུང་གི་ནད་ཡིན་པ་དང་། ལྦུ་བ་ཉ་མིག་ལྟར་ཕྲ་བ་སྟེ་ཆུང་ལ་སིབ་སིབ་མང་བ་ཁ་དོག་སེར་པོ་དང་སངས་པ་སྐྱེན་པ་སྟེ་མྱུར་དུ་ཞིག་འགྲོ་བ་ཡིན་ན་མཁྲིས་པའི་ནད་ཡིན། ཀུ་ཡ་བརྟག་པའི་དུས་སུ་ཀུ་ཡའི་དབྱིབས་དང་ཁ་དོགགནས་སྟངས་བཅས་ལ་བལྟོས་ནས་ནད་རིགས་གང་ཡིན་ངོས་འཛིན་ཐུབ་པ་དང་། སྤྲིས་མ་བརྟག་པའི་དུས་སུ་སྤྲིས་མ་མཐུག་ན་ནད་གཞིའི་ངོ་བོ་ཚ་བ་དང་སྤྲིས་མ་སྲབ་ན་ནད་གཞིའི་ངོ་བོ་གྲང་བ་བཅས་ཡིན་ནོ།། དཔལ་ལྡན་རྒྱུད་བཞིའི་ཕྱི་མ་རྒྱུད་ལས། འཚོ་འཆིའི་ལ་ཤན་རྩ་ཡིས་འབྱེད་ན་ཡང་།། ཚ་གྲང་ལ་ཤན་ཆུ་ལ་མཐོང་བས་གསལ།། ཞེས་གསུངས་ཡོད་པས།བོད་ཀྱི་གསོ་བ་རིག་པའི་དྲི་ཆུར་བརྟག་པ་ནི་ནད་གཞིའི་ཚ་གྲང་ལ་ཤན་འབྱེད་པའི་སྐབས་སུ་དོན་སྙིང་གལ་ཆེན་ལྡན།།